[無綫][七公主] 網上流傳多年黃翠如喺台慶劇《幕後玩家》大結局一幕，對住病床上黃宗澤嘅一組cap圖，話佢一個表情做晒所有情緒，批評佢演技差。
六年後，黃翠如參演《幕後玩家》監製陳維冠嘅作品《七公主》，演高傲冷漠嘅大家姐大律師顧靈珊，絕大部分一味冷漠嘅角色限制咗演繹變化。去到琴晚第25集，顧靈珊終於因為強大壓力同幻象嘅刺激而崩潰。
呢一幕翠如嘅演出交出成績，亦為佢「一面千演」嘅障礙作出有力嘅平反。其實之前喺《那些我愛過的人》，翠如有一幕一shot過同自己細個對話嗰段都已經見到佢嘅進步，不過今次情緒層次更多。
翠如處理一段連續變化情緒嘅演出，能力係提升咗。但喺顧靈珊嘅性格限制之下，要佢喺情緒冇乜變化嘅有限空間發揮，仍然好吃力，顧靈珊喺全劇都係咁上下情緒，真係好難演。點樣處理呢啲無起伏嘅部分？演員重要，但其實劇本同拍攝設計好啲嘅話，可以減少呢類情況。
#無綫 #TVB #七公主 #黃翠如 黃翠如 Priscilla Wong
Search